tu be-naqab hai ai mah ye hain sharab ke din
ki mahtab ki raten hain aftab ke din
javan tu bhi hai apne bhi hain shabab ke din
bila hisab de bose nahin hisab ke din
hua safed tiri intizar men akhir
ajab tarah se phire dida-e-pur-ab ke din
tire labon se hai ru-kash ajab tarah ke hain mast
lage hain din use kyun-kar phiren sharab ke din
qarar ye tha ki itvar ke din aunga
kaha tha main ne gae mere iztirab ke din
hua do-chand alam aah roz-e-yak-shamba
vo aftab mira aaya aftab ke din
vo zulf mujh pe hai be-vajh rat-din barham
kisi tarah se na badhti nahin itaab ke din
jigar se shoale nikalte hain chashm se aansu
is ab-o-tab se katte pech-o-tab ke din
na jaao shaikh ji aao qarib hai holi
khafa na ho ki chale aate hain khitab ke din
pilai mai ramazan men na mujh ko ai saaqi
bade azaab se katte hain ye savab ke din
azab-e-hijr bhi dozakh se kam nahin ‘ehsan’
ilahi mujh ko na dikhlaiyo azaab ke din
Leave a Reply