sard sannaTon ki sab sargoshiyan le ja.unga
main jahan bhi ja.unga dil ki zaban le ja.unga
shahar chhoḌunga to ro.engi milon ki chimniyan
dekhna ik roz main saara dhuan le ja.unga
vo jahan chahe chala jaa.e ye us ka iḳhtiyar
sochna ye hai ki main ḳhud ko kahan le ja.unga
sat.h-e-dariya raqs men hai aaj mujh ko dekh kar
aaj main us paar apna karvan le ja.unga
vo agar do-char qatron se navazega to kya
ek ik qatre men bahr-e-be-karan le ja.unga
manzaron ko kya ḳhabar hogi ki un ke vaste
qurbaten taqsim kar ke duriyan le ja.unga
jin andheron se tumhen har-vaqt vahshat hai ḳhayal
un andheron tak tumhari dastan le ja.unga
Leave a Reply