Zaheer Dehlvi
talḳh shikve lab-e-shirin se maza dete hain
ghol kar shahd men vo zahr pila dete hain
yuun to hote hain mohabbat men junun ke asar
aur kuchh log bhi divana bana dete hain
parda uTThe ki na uTThe magar ai parda-nashin
aaj ham rasm-e-takalluf ko uTha dete hain
aate jaate nahin kambaḳht payami un tak
jhuTe sachche yunhi paigham suna dete hain
vaa.e taqdir ki vo ḳhat mujhe likh likh ke ‘zahir’
meri taqdir ke likkhe ko miTa dete hain
Leave a Reply