Akhtar Hoshiyarpuri
shaam tanhai dhuan uThta barabar dekhte
phir sar-e-shab chand ubharne ka bhi manzar dekhte
jumbish-e-lab men miri avaz ki tasvir hai
kaash vo bhi bolte lafzon ke paikar dekhte
sahilon par sipiyan thiin aur hava ka shor tha
paniyon men dubte to koi gauhar dekhte
khiḌkiyon ki oT se andaza ho sakta nahin
shahr ka ahval tum ghar se nikal kar dekhte
aane valon ke liye darvaze rahte hain khule
jaane vaale bhi kabhi muḌ kar su-e-dar dekhte
barishon men bhigna jismon ka ujla bankpan
raston ki gard bhi ye log sar par dekhte
vo jinhen dastar ki hasrat rahi hai umr bhar
mere shanon par kabhi ‘aḳhtar’ mira sar dekhte
Leave a Reply