Hosh Tirmizi
yaden chalen ḳhayal chala ashk-e-tar chale
le kar payam-e-shauq ka.i nama-bar chale
dil ko sambhalte rahe har hadse ye ham
ab kya karen ki ḳhud tire gesu bikhar chale
har gaam par shikast ne yuun hausla diya
jis tarah saath saath koi ham-safar chale
shauq-e-talab na ho koi bang-e-jaras to ho
aḳhir koi chale to kis ummid par chale
ab kya karoge sair-e-saman-zar-e-arzu
rut ja chuki chaḌhe hue dariya utar chale
rahon men ‘hosh’ sang baraste hain har taraf
le kar ye karvan-e-tamanna kidhar chale
Leave a Reply