Zeeshan Sahil
dil muztarib hai aur pareshan jism hai
us ke baghair be-sar-o-saman jism hai
ab ho nahin sakega mudava kisi tarah
vo jo kahin nahin hai to be-jan jism hai
dil to junun ke khel men masruf hai magar
us ki navazishat pe hairan jism hai
main ne bana diya hai jise ishq men ghazal
dil us ka hai bayaz to divan jism hai
ab us ke gham se mujh ko milegi kahan najat
dil pasban hai aur nigahban jism hai
Leave a Reply