jo nekiyon se badi ka javab deta hai
ḳhuda bhi us ko sila be-hisab deta hai
usi ke hukm se ghar-bar ujaḌ bhi jaate hain
vahi phir un ko basane ke ḳhvab deta hai
bashar pe qarz jo hote hain kar-ha-e-jahan
tamam-umr vo un ka hisab deta hai
gharaz ye hai na ho fikr-o-amal men kotahi
ḳhuda dilon ko agar iztirab deta hai
qusur is men bhi hai valdain ka shayad
jo bachcha un ko palaT kar javab deta hai
kaTi hai umr azabon men dekhna hai ab
mazid kya dil-e-ḳhana-ḳharab deta hai
vo azmata hai kanTon se sabr insan ka
phir us ke ba.ad mahakte gulab deta hai
saval did-o-mulaqat kar chuke hain ‘chand’
ab aage dekhiye vo kya javab deta hai
Leave a Reply