Mohsin Naqvi
qatl chhupte the kabhi sang ki divar ke beach
ab to khulne lage maqtal bhare bazar ke beach
apni poshak ke chhin jaane pe afsos na kar
sar salamat nahin rahte yahan dastar ke beach
surḳhiyan amn ki talqin men masruf rahin
harf barud ugalte rahe aḳhbar ke beach
kaash is ḳhvab ki ta.abir ki mohlat na mile
sho.ale ugte nazar aa.e mujhe gulzar ke beach
Dhalte suraj ki tamazat ne bikhar kar dekha
sar-kashida mira saaya saf-e-ashjar ke beach
rizq malbus makan saans maraz qarz dava
munqasim ho gaya insan inhi afkar ke beach
dekhe jaate na the aansu mire jis se ‘mohsin’
aaj hanste hue dekha use aghyar ke beach
Leave a Reply