raat dadhi ke andhere se takalluf barte
arsh ke samne rusvai ki gardan na uthe
izn-e-sajda pe kamar takhta na ho jaae kahin
khokhle lafzon men loha to nahin bhar sakte
saikadon saal ki tabligh ke chalis samar
kashti ban jaae to tannur se paani uble
salha-sal se aram natija matlub
tin-sau-sath sanam khana-e-kaaba se chale
reg-zaron men ghubar aur khajuri saae
uunt ki aankh men tashhir hua dard-e-safar
koi ‘hinda’ se kahe daant kahan hain tere
fath-e-makka se magar log hidayat paaen
khuun jam jaae jo nalain men chalte chalte
arsh ki aankh se rahmat ka samundar uble
jibrail apni haiat men hain numaish-manzar
paanv patal men sar charkh se takrae kahin
par jo khole to har ik samt pe parde latken
aur jalta hua suraj abhi kho jaae kahin
qafila aaya hai ‘bu-bakr’ se mansub magar
maal taqsim hua daman-e-hajat-mandan
nuur kandhe pe uthae shab-e-hijrat ke safir
ghaar men saath rahe paas hi paivand hue
masjid-e-nabvi men ambar-e-ghanimat raushan
log rote hue nikle hain pareshan-manzar
raushni pahunchi ‘abu-jahl’ ki divaron tak
ghar ki tariki men rasta na bane binai
ped ke saae ki pahchan yahudi rahib
ruk gaya ab-e-ravan beva ke darvaze par
dast-e-zohra men nishanat ayaan chakki se
ilm ke baab ‘ali’ umr men sab se chhote
chand ka naam tire chak-garebanon men
mubtadi dhundte hain masjid-e-aqsa men imaam
sidrat-ul-muntaha jibril ijazat mange
kaun tha kis ne pukara ki chale bhi aao
kaun maujud tha pahle se vahan kaun gaya
kaun sunta tha vahan kis ne pukara kis ko
kis ki avaz ki tanvir se aalim chamke
sar-bulandi thi muqaddar men qalam se pahle
bakriyan kaun ‘halima’ ki charane jaae
‘amina’ batn se izhar hai aadam ka uruuj
mujtama kis ne kiya logon ko parbat ke qarib
kis ne lalkara zalalat ko musalsal tanha
jau ki roti kabhi mil jaae kabhi faqa-kashi
bhuuk se pet pe patthar kabhi bandhe kis ne
tin-sau-terah ki taadad hai kis ginti men
fikr pe daera-kun khandaqen khodi jaaen
duur ki dhuup men hai faisla-kun rah-e-tabuk
‘hanzala’ samne aa jaaen jo chhat jaae ghubar
main ne pahuncha diya tum tak jo mujhe pahuncha tha
main ne pahuncha diya tum tak jo mujhe pahuncha tha
main ne pahuncha diya tum tak jo mujhe pahuncha tha
koi pardesi hai kheme pe pareshan-surat
aur ‘faruq’ chale biivi ko ham-rah liye
fasle tod kar avaz ke saae phaile
hakim-e-vaqt ka kurta kai paivand laga
bakriyan jis se sambhali nahin jatin thiin kabhi
nisf duniya pe khilafat ke alam lahrae
yaad hai sahibo khaibar ko ukhada kis ne
kis ki talvar thi aina zamane ke liye
kis ne zarkhez shujaat ke sitare boe
jaan di javedan lamhat tilavat mashghul
khuun ke dhabbe hain quran pe tabinda nazar
kaun rota tha musalle pe hamari khatir
pair varma gae kis ke shab-e-sajda-o-qiyam
do mahinon men makanon se dhuan tak na uthe
fikr-e-ummat ki har ik lamha lahu men karvat
jism raushan tha chatai ke nishan bhi raushan
galiyan khate phiren makka ke bazaron men
aur tanha kabhi taaef se nikale jaaen
marhaba shukr ka thahrao bahishti zevar
marhaba sabr ka irfan ki meraj-e-hayat
nuur majsum hua gumbad-e-khazra markuz
hashr ki subh darakhshan ho maqam-e-mahmud
haath raushan rahe kausar se qarabat manzar
khuun ab sard hua jaata hai shiryanon men
aur badhti hui taadad bharosa tode
nafs daudata hai phir janib-e-shahvat ghode
lazzat-e-shai men hain maadum charaghon ki laven
raushni apne padosi ko bhi pahuncha na sake
ruuh ab shoalagi mange hai har ik zarre se
koi ilyas ki baton pe zara kaan dhare
koi yusuf se shahadat ke maani puchhe
koi taqsim kare vaqt ko masjid masjid
koi baiat to kare dast-e-zakariya hazir
markaz-e-ishq pe pahuncho to ho inam-e-nazar
ek ik lamha ke chehre se ayaan izn-e-safar
gumrahi qilon men mahfuz rahegi kab tak
sar uthaegi hava badban khul jaenge
band darvazon pe dastak ki sada gunjegi
dhuup dahliz pe pahunchaegi mehmanon ko
saeban sar pe ababil liye saath chale
talkh tahzib ke sahra men azaan lahrae
guunj utthega haram nara-e-labbaik, zamin
tere qadmon men ugal degi khazane apne
teri taqlid men maghrib ki baqa poshida
teri tazlil men jo haath uthe kat jaae
teri nusrat ke liye asman koshish maqsud
silsile tere banen zeb-e-jahan-e-fani
nuur majsum hua gumbad-e-khazra markuz
hashr ki subh darakhshan ho maqam-e-mahmud
Leave a Reply