mauj-e-bala men roz koi Dubta rahe
sahil har ek baar magar dekhta rahe
yaron ki kashtiyan rahin sahil se be-niyaz
tufan se be-niyaz agar naḳhuda rahe
ḳhairat men kabhi nahin mangin mohabbaten
har-chand mere dost mujhe aazma rahe
jin ko nahin thi daulat-e-ehsas tak nasib
takrim-e-be-nazar men vahi devta rahe
main aise husn-e-zan ko ḳhuda manta nahin
aahon ke ehtijaj se jo mavara rahe
maana ki har tarah hai taghayyur se be-niyaz
lekin vo hal-e-gham se to kuchh ashna rahe
‘kaifi’ zamir-baḳhta logon se kab talak
ḳhairat-e-ehtiram koi mangta rahe
Leave a Reply