Khalid Irfan
kaisa ajiib aaya hai is saal ka bajaT
murghi ka jo bajaT hai vahi daal ka bajaT
jitni hai ik clerk ki tanḳhvah aaj kal
utna hai begamat ke ik gaal ka bajaT
sirf ek din men biis musafir hue halak
hazir hai sa.in gulshan-e-iqbal ka bajaT
T.v ka ye mazaq adibon ke saath hai
sha.er se dugna rakh diya qavval ka bajaT
bichhḌe the jab ye log mahina tha june ka
sohni bana rahi thi mahinval ka bajaT
damad ko nikal ke jab bhi hua hai pesh
salon ne paas kar diya sasural ka bajaT
bikti hai ab kitab bhi cassette ke rate pe
kaise banega ‘ghalib’ o ‘iqbal’ ka bajaT
maan kah rahi thi rang lipstick ke dekh kar
chaT kar diya bahu ne mire laal ka bajaT
donon bane hain ba.is-e-taklif aj-kal
‘is.haq’-Dar aur na.e saal ka bajaT
Leave a Reply