Shamim Ravish
ankhon men hijr chehre pe gham ki shikan to hai
mujh men saji hui magar ik anjuman to hai
sanson ko us ki yaad se nisbat hai aaj bhi
mujh men kisi bhi taur sahi bankpan to hai
har sub.h chahchahati hai chiḌiya munDer par
viran ghar men aas ki koi kiran to hai
mumkin hai us ka vasl mayassar na ho mujhe
lekin is aarzu se mira ghar chaman to hai
har vaqt mahv-e-raqs hai chehra ḳhayal men
be-rabt zindagi hai magar dil magan to hai
har lamha us se rahta huun masruf-e-guftugu
kahne ko mere saath koi ham-suḳhan to hai
mere liye ye baat hi kaafi hai ai ‘ravish’
kuchh bhi ho mujh men ab bhi mira apna-pan to hai
Leave a Reply