bas tira ism munajat men rakkha hua hai
gardish-e-vaqt ko auqat men rakkha hua hai
ye tire adl-o-musavat men rakkha hua hai
tu ne to ajr bhi darjat men rakkha hua hai
ab mujhe ja ke har ik dar pe sada deni hai
jab mira rizq hi ḳhairat men rakkha hua hai
apni har baat pe hota hai vilayat ka guman
ishq ne kaise tilismat men rakkha hua hai
tu ne jo aḳhiri maktub mujhe bheja tha
main ne ik umr se barsat men rakkha hua hai
raunaq-e-shahr kabhi raas nahin aa.i ‘zaki’
dil ko bahla ke mazafat men rakkha hua hai
Leave a Reply