ham ne maana hamen barbad karegi duniya
kar ke barbad magar yaad karegi duniya
jab use zulm-o-sitam hi men maza aata hai
kisi nashad ko kya shaad karegi duniya
dekhna ye hai ki ham ahl-e-junun par kab tak
nit na.e tarz ki bedad karegi duniya
aaj tu apni karamat pe itrati hai
kal magar aap hi fariyad karegi duniya
dushmani hai use arbab-e-vafa se lekin
ye na honge to inhen yaad karegi duniya
nahin ma.alum yunhi ḳhud ko kahan tak ‘mansha’
qaid-e-aḳhlaq se azad karegi duniya
Leave a Reply