shayad abhi hai raakh men koi sharar bhi
kyuun varna intizar bhi hai iztirar bhi
dhyan aa gaya tha marg-e-dil-e-na-murad ka
milne ko mil gaya hai sukun bhi qarar bhi
ab dhundne chale ho musafir ko dosto
had-e-nigah tak na raha jab ghubar bhi
har astan pe nasiya farsa hain aaj vo
jo kal na kar sake the tera intizar bhi
ik raah ruk gai to thithuk kyuun gaiin ‘ada’
abad bastiyan hain pahadon ke paar bhi
Leave a Reply