Hijr Ke Par Bhig Jaen

kahan tak khema-e-dil men chhupaen

apni aason aur pyason ko

kahan tak khauf ke be-shakl sahra ki hatheli par

kurede jaaen ankhen aur

lakiren raushni ki phir na ban paaen

ham insan ho ke bhi saae ki khushbu ko taras jaaen

chalo ik dusre ki khvahishon ki dhuup men

jalte hue angan ki virani men ankhen band kar len aur baras jaaen

yahan tak tuut kar barsen ki paani

vasl ki mitti men khushbu gundh le aur phir saron tak se guzar jaae

zamin se asman tak ek hi manzar sanvar jaae

hamare raston par asman apni gavahi bhej de

khushbu bikhar jaae

zamin paanv ko chhu le

chandni dil men utar jaae

hava gar hijr ki sazish men hisse-dar ban kar darmiyan aae

hijr ke par bhiig jaaen aur

hava paani men mil jaae