Kabhi Lutf-E-Zaban-E-Khush-Bayan The

Wajid Ali Shah Akhtar

kabhi lutf-e-zaban-e-khush-bayan the

zamin-e-sher ke ham asman the

laga thokar na paae naaz se tu

kabhi taj-e-sar-e-hindostan the

zamin par charkh deta hai abas tu

kabhi pir-e-falak ham bhi javan the

zar-e-gul ban gaya naala hamara

chaman men bhi hamin atish-fishan the

makin thi ruuh chhoda jism jis dam

kirae ke ye sab qasr-o-makan the

vahi jangal hai ab par us se aage

chaman the gul the ham the baghban the

nahin ab zabt baaqi na-tavan huun

mire aansu nihayat raz-dan the

mire nalon se pahuncha qafila sab

jaras bekar mashghul-e-fughan the

jagaya na-tavan-binon ne un ko

abas vo mail-e-khvab-e-garan the

dabe zer-e-zamin ai charkh mah-ru

yahan do din ke ye sab mehman the

ajab mausam men katti thi javani

chaman tha aur lutf-e-qissa-khvan the

kahan majnun kahan ‘farhad’-o-‘vamiq’

hamari maut ke sab nauha-khvan the

savad-e-lucknow chhoda alam men

ye ‘akhtar’ bhi ghazab ke khush-bayan the