Jaikrishn Chaudhry Habeeb
tanha.iyon men kya kahun kya yaad aa gaya
afsana ek bhula hua yaad aa gaya
asan samajh ke manzil-e-janan pe ho liye
vo mushkilen paḌi ki ḳhuda yaad aa gaya
samjha tha main ki dil men vo ab mahv ho chuka
pahle se bhi magar vo siva yaad aa gaya
dil ne fareb ishq men khaa.e hain baar baar
har baar dil ko ahd-e-vafa yaad aa gaya
mera sar-e-ghurur nadamat se jhuk gaya
us ka karam jo mujh ko zara yaad aa gaya
gumnam tha ‘habib’ aur gumnam chal diya
us ka magar vo sidq-o-safa yaad aa gaya
Leave a Reply