Kisi Surat To Dil Ko Shad Karna

kisi surat to dil ko shaad karna

hamen dushman samajh kar yaad karna

duaen denge chhut kar qaidi-e-zulf

jahan tak ho sake azad karna

kahin vo afrin aisa pade haath

na mujh par rahm o jallad karna

masihai dikhana baad-e-murdan

jo dil chahe to kuchh irshad karna

uda do khaak meri thokaron se

agar manzur hai barbad karna

adab sikhe nahin huun nau-giraftar

bata kar qaede bedad karna

maza tha bebasi ki galiyon men

isi bhule sabaq ko yaad karna

bahut mushkil hai in sangin-dilon se

khayal-e-khatir-e-nashad karna

janaza uth chuke mera to tum bhi

ada rasm-e-mubarak-bad karna

‘nasim’-e-khasta-dil ne jaan de di

ghazab laaya tira bedad karna

Leave a Comment