Syed Sarosh Asif
chand ko dekh ke jugnu ne farmaya hai
sub.h ka bhula shaam ko lauT ke aaya hai
vasl ne kam-umri men jaan ganva.i aur
hijr hamara amrit pi kar aaya hai
jo na ho paaya vo us ki marzi hai
jo bhi hota hai vo us ki maaya hai
darj hua hai bad-nami ke khate men
ishq men ham ne jitna naam kamaya hai
hairat karte hain bachche jab sunte hain
ek ruupe men ham ne kya kya khaya hai
phir mayusi ko is men phansana hoga
phir se ummidon ne jaal bichhaya hai
aur koi ab rang nahin chaḌhta mujh par
us ne aisa apna rang jamaya hai
lafzon ne jab haath kabhi khincha apne
ḳhamoshi ne apna haath baḌhaya hai
ḳhushiyon ka lamha bhi bachchon jaisa hai
ghuTnon ghuTnon chal kar mujh tak aaya hai
kaisi kaisi baten dil men aa.iin hain
raat ga.e jab phone kisi ka aaya hai
Leave a Reply