ye meri ghazlen ye meri nazmen
tamam teri hikayaten hain
ye tazkire tere lutf ke hain
ye sher teri shikayaten hain
main sab tiri nazr kar raha huun
ye un zamanon ki saaten hain
jo zindagi ke nae safar men
tujhe kisi vaqt yaad aaen
to ek ik harf ji uthega
pahan ke anfas ki qabaen
udaas tanhaiyon ke lamhon
men naach utthengi ye apsaraen
mujhe tire dard ke alava bhi
aur dukh the ye manta huun
hazar gham the jo zindagi ki
talash men the ye janta huun
mujhe khabar thi ki tere anchal men
dard ki ret chhanta huun
magar har ik baar tujh ko chhu kar
ye ret rang-e-hina bani hai
ye zakhm gulzar ban gae hain
ye ah-e-sozan ghata bani hai
ye dard mauj-e-saba hua hai
ye aag dil ki sada bani hai
aur ab ye saari mata-e-hasti
ye phuul ye zakhm sab tire hain
ye dukh ke nauhe ye sukh ke naghme
jo kal mire the vo ab tire hain
jo teri qurbat tiri judai
men kat gae roz-o-shab tire hain
vo tera shair tira mughanni
vo jis ki baten ajiib si thiin
vo jis ke andaz khusravana the
aur adaen gharib si thiin
vo jis ke jiine ki khvahishen bhi
khud us ke apne nasib si thiin
na puchh is ka ki vo divana
bahut dinon ka ujad chuka hai
vo kohkan to nahin tha lekin
kadi chatanon se lad chuka hai
vo thak chuka tha aur us ka tesha
usi ke siine men gad chuka hai
Leave a Reply