main ne ye jab suna to mira dil dahal gaya
suraj ka jism aag ki lapTon se jal gaya
mausam ne aisi aag laga.i thi raat men
mere badan men ḳhuun tha jitna ubal gaya
sukhe labon ki pyaas bujhane ke vaste
kal raat chand barf ki surat pighal gaya
manzar ajab ye dekh ke hairat-zada hain phuul
shabnam ka paanv dhuup ki shiddat se jal gaya
ta.abir ki hatheliyan piili na ho sakin
ik ḳhauf mere ḳhvab ke sar ko kuchal gaya
parchha.iyon ne aks ke kapḌe pahan liye
a.ina jab se sang ke paikar men Dhal gaya
kaise bata.en tujh ko ki teri talash men
saaya hamare jism ka paidal nikal gaya
honTon se tere lafzon ke badal baras ga.e
ḳhamoshiyon ka dasht-e-sukun tha jo jal gaya
jalte hue charagh pe juun hi nazar paḌi
kuchh sar-phiri havaon ka lahja badal gaya
Leave a Reply