Poet
kabhi shu.ur kabhi dil kabhi suḳhan mahke
kaho vo sher ki duniya-e-fikr-o-fan mahke
ata hamen bhi jo ho jaa.e ‘mir’ ka andaz
to lafz lafz se ma.ani ka pairahan mahke
rahun ḳhamosh to phulon ko niind aa jaa.e
paḌhun jo sher to lafzon ka bankpan mahke
larazte honTon ki vo guftugu to yaad nahin
bas itna yaad hai barson lab-o-dahan mahke
dabi hui hai jo sadiyon se gham ki chingari
bhaḌak uThe to ḳhayalon ki anjuman mahke
kabhi to aisa zamana bhi aa.e ai ‘gauhar’
mohabbaton ki faza se mira vatan mahke
Leave a Reply