Bismil Azimabadi
ab mulaqat kahan shishe se paimane se
fatiha paḌh ke chale aa.e hain mai-ḳhane se
kya karen jam-o-subu haath pakaḌ lete hain
ji to kahta hai ki uTh ja.iye mai-ḳhane se
phunk kar ham ne har ik gaam pe rakkha hai qadam
asman phir bhi na baaz aaya sitam Dhane se
ham ko jab aap bulate hain chale aate hain
aap bhi to kabhi aa ja.iye bulvane se
are o va.ada-faramosh pahaḌ aisi raat
kya kahun kaise kaTi tere nahin aane se
yaad rakh! vaqt ke andaz nahin badlenge
are allah ke bande tire ghabrane se
sar chaḌha.en kabhi ankhon se laga.en saaqi
tere hathon ki chhalak jaa.e jo paimane se
ḳhali rakkhi hui botal ye pata deti hai
ki abhi uTh ke gaya hai koi mai-ḳhane se
aa.egi hashr ki naseh ki samajh men kya ḳhaak
jab samajhdar samajhte nahin samjhane se
barq ke Dar se kaleje se laga.e hue hai
chaar tinke jo uTha laa.i hai virane se
dil zara bhi na pasija but-e-kafir tera
ka.aba allah ka ghar ban gaya but-ḳhane se
sham.a bechari jo ik munis-e-tanha.i thi
bujh ga.i vo bhi sar-e-sham hava aane se
ghair kaahe ko sunenge tira dukhḌa ‘bismil’
un ko fursat kahan hai apni ghazal gaane se
Leave a Reply