Bar-Ha dil Ko Main Samjha Ke Kaha Kya Kya Kuchh

bar-ha dil ko main samjha ke kaha kya kya kuchh

na suna aur khoya mujh se mira kya kya kuchh

izzat-o-abru o hurmat o diin o iman

rouun kis kis ko main yaaro ki gaya kya kya kuchh

sabr o aram kahun ya ki main ab hosh-o-havas

ho gaya us ki judai men juda kya kya kuchh

ishq kis zaat ka aqrab hai ki lagte hi niish

dil ke saath ankhon se paani ho baha kya kya kuchh

sada-rui ne to khoya dil o diin se dekhen

khat ke aane men hai qismat ka likha kya kya kuchh

dakhl kya rah-e-mohabbat men niko-nami ko

aaya is kuche men jo un ne suna kya kya kuchh

valih-o-shefta o zar-o-hazin o majnun

apne ashiq ko kal us ne na kaha kya kya kuchh

girya-e-shisha kabhi tha to kabhi khanda-e-jam

saaqi is daur men tere na hua kya kya kuchh

ghurra mat ho jo zamane se tiri ban aai

tha vo kya kya ki na bigda na bana kya kya kuchh

shadi aane ki na kar yaar na jaane ka gham

aaya kya kya na kuchh is ja na gaya kya kya kuchh

siina qanun o ghina naala o dil hai mizrab

nikle hai saz-e-mohabbat se sada kya kya kuchh

dosto haq men taraqqi o tanazzul apne

kya kahen ham ko zamane se hua kya kya kuchh

zoaf o na-taqati o susti o aaza-shikani

ek ghante men javani ke badha kya kya kuchh

sair ki qudarat-e-khaliq ki butan men ‘sauda’

musht bhar khaak men jalva hai bhala kya kya kuchh