kaḌi thi dhuup to saaya uḌa gaya vo shaḳhs
siyah thi raat to mash.al jala gaya vo shaḳhs
masiha ban ke jo marham ba-dast aaya tha
kuchh aur dard ko mere baḌha gaya vo shaḳhs
guzar ke jaan se mohabbat ke raste men aaj
alam-kashon ko rah-e-nau dikha gaya vo shaḳhs
suna ke dard bhari dastan mazalim ki
sabhon ko ḳhuun ke aansu rula gaya vo shaḳhs
vo jis ke vaste phulon ki sej rakhte the
hamari raah men kanTe bichha gaya vo shaḳhs
main jis ke vaste sheron ke jaal bunta tha
miri ghazal sar-e-mahfil suna gaya vo shaḳhs
Leave a Reply