Tere Siwa Bhi Koi Mujhe Yaad Aane Wala Tha

tere sivā bhī koī mujhe yaad aane vaalā thā

maiñ varna yuuñ hijr se kab ghabrāne vaalā thā

jān-būjh kar samajh kar maiñ ne bhulā diyā

har vo qissa jo dil ko bahlāne vaalā thā

mujh ko nadāmat bas is par hai log bahut ḳhush haiñ

is lamhe ko kho kar jo pachhtāne vaalā thā

ye to ḳhair huī dariyā ne ruḳh tabdīl kiyā

merā shahr bhī us kī zad meñ aane vaalā thā

ik ik kar ke sab raste kitne sunsān hue

yaad aayā maiñ lambe safar par jaane vaalā thā

Leave a Comment