har tajraba shikar-e-fareb-e-nazar hua
kin zulmaton pe aah guman-e-sahar hua
kis kis ada se aaj koi jalva-gar hua
aaya nazar ko hosh to dil be-ḳhabar hua
ai rahnuma jasarat-e-rahzan ki daad de
jo hadisa hua vo sar-e-rahguzar hua
hai afrin jo hanste nahin hain tamam-umr
ham se to ek din bhi na gham ka basar hua
pahle to arz-e-gham ki ijazat na denge vo
vaqfa bahut qalil sa hoga agar hua
rakkhi thi jis pe tera nasheman bahar men
kya iltifat-e-barq isi shaḳh par hua
ye puchhna abas hai dil-e-ḳhush-ḳhayal se
abad ham hue hain ki barbad ghar hua
Leave a Reply