fauziya-rabab

Ghayal Hai Teri Shahzadi Shahzade

ghayal hai teri shahzadi shahzade

tu ne jo har baat bhula di shahzade

har janib ho ek munadi shahzade

teri ho gai ye shahzadi shahzade

hanste hanste roti huun phir hansti huun

ishq ne kaisi mujh ko saza di shahzade

aaj bhi arsh ko dekha tera naam liya

aaj bhi main ne tujh ko dua di shahzade

shaam Dhale to dard bhi apni aamad ki

kar deta hai roz munadi shahzade

ham ne to bas pyaar kiya tha paap nahin

logon ne to baat badha di shahzade

tujh ko chaha to phir tuut ke chaha hai

shoalon ko bhi khuub hava di shahzade

qabr pe rote rahne se sukh paoge

tum ne kitni der laga di shahzade

bolo akhir dil par kya kuchh bitegi

tum ne jo har yaad mita di shahzade

jitni umr hai baaqi vo bhi tere naam

jitni thi vo tujh pe luta di shahzade

aaj ‘rabab’ ke lab par chikhi khamoshi

khamoshi ne tujh ko sada di shahzade

More Poems

Leave a Comment