Ab Is Se Milne Ki Ummid Kya Guman Bhi Nahin

Shakeel Azmi

ab is se milne ki ummid kya guman bhi nahin

zamin ga.i to ga.i sar pe asman bhi nahin

bujha bujha sa hai dil ka alaav barson se

kisi ki yaad ka ankhon men ab dhuan bhi nahin

na.i sadi ke safar men bhi ham akele hain

hava ke dosh pe ḳhushbu ka karvan bhi nahin

tumhin batao yahan kis tarah ji.en ham log

tumhare shahar men ghazlon ki ik dukan bhi nahin

gharon men sahm ke baiThe hue hain sab bachche

samundaron pe kahin ret ka makan bhi nahin

is ehtiyat se ankhon men kaun aaya tha

subut ke liye palkon pe ik nishan bhi nahin

ik aise raaz ki manind ji raha huun ‘shakil’

ki jis ka mere siva koi raz-dan bhi nahin