Anwar Shuoor
shak nahin hai hamen us but ke ḳhuda hone men
chain hi chain hai razi-ba-raza hone men
kaun chhup chhup ke mohabbat nahin karta aḳhir
kya bura.i hai yahi khel khula hone men
bat-be-bat unhen aadat hai ḳhafa hone ki
koi saani nahin rakhte vo ḳhafa hone men
zinda rahne se baḌa jurm bhala kya hoga
taham ik umr guzari hai saza hone men
pahle duniya men vafa koi sifat hoti thi
sharm aati hai ab arbab-e-vafa hone men
mas.ala ban ga.i chhoTi si bura.i ai ‘shu.ur’
kya takalluf hai bhala aur bura hone men
Leave a Reply