afzal-allahabadi

Yaadon Ke Nasheman Ko Jalaya To Nahin Hai

yadon ke nasheman ko jalaya to nahin hai

ham ne tujhe is dil se bhulaya to nahin hai

kaunain ki vusat bhi simat jaati hai jis men

ai dil kahin tujh men vo samaya to nahin hai

har shai se vo zahir hai ye ehsan hai us ka

khud ko miri nazron se chhupaya to nahin hai

zulfon ki syahi men ajab husn-e-nihan hai

ye raat usi husn ka saaya to nahin hai

vaqif hain tire dard se ai naghma-e-ulfat

ham ne tujhe har saaz pe gaaya to nahin hai

us ne jo likha tha kabhi sahil ki jabin par

us naam ko maujon ne mitaya to nahin hai

vo shahar ki is bhiid men aata nahin ‘afzal’

phir bhi chalo dekhen kahin aaya to nahin hai

More Poems

Leave a Comment