thi dhuup tez is qadar badan bhi jaise jal gaya
magar baḌha jo mera qad to aftab Dhal gaya
jab us gali men jhuuT ki sunin fareb-kariyan
to us gali men sach suna aur aage main nikal gaya
jo mera naam aa gaya vo muskura ke rah gaya
raqib ki ḳhushamadon ka zor us pe chal gaya
yahan har ek samt hain latafaten nafasaten
kahin ye dil Thahar gaya kahin ye dil machal gaya
ye rahne vaala shahr ka yaqin na kar saka kabhi
vo rahne vaala gaaon ka ki jhuuT se bahal gaya
thi mere paas raushni to vo bhi mere saath tha
andhera jab hua to vo kahan se kab nikal gaya
mujhe nahin hai is ka gham ki muflisi mili mujhe
mujhe ye gham sata raha hai us ka kaam chal gaya
hamen ‘niyazi’ aaj bhi tiri vo baat yaad hai
jo gir gaya so gir gaya jo uTh gaya sanbhal gaya
Leave a Reply