tum ne kyon hans ke mujhe ek nazar dekh liya
aaj kya aa ga.i ji men jo idhar dekh liya
ham kis ummid pe a.inda koi aah karen
ham ne kis aah ko mamnun-e-asar dekh liya
karvaTen lete hue tum bhi tasavvur men mile
tum ko bhi zinat-e-aghosh-e-nazar dekh liya
tere bimar ko kyon dekhne aa.e the tabib
pyaar ki aankh se tu ne na udhar dekh liya
kyon ḳhafa hote ho kyon paḌ ga.i mathe pe shikan
kya hua chashm-e-mohabbat se agar dekh liya
girti paḌti lab-e-‘qaisar’ se dua nikli hai
ye hi asar-e-asar hain to asar dekh liya
Leave a Reply