Poet
tum apne mariz-e-gham-e-hijran ki ḳhabar lo
saunpa hai agar dard to darman ki ḳhabar lo
hanste ho abas hal-e-pareshan pe hamare
apni to zara zulf-e-pareshan ki ḳhabar lo
yuun aur mujhe ḳhalq men bad-nam karoge
bas hosh sambhalo bhi gareban ki ḳhabar lo
kis kaam ye aa.egi masiha.i tumhari
ehsan karo ashiq-e-be-jan ki ḳhabar lo
phaile hue surme ko to rumal se puchho
kya vaz.a hai ye nargis-e-fatan ki ḳhabar lo
kahta hai yahi tum se ‘shu.ur’-e-jigar-afgar
saunpa hai agar dard to darman ki ḳhabar lo
Leave a Reply