Marghoob Asar Fatmi
na koi dar na daricha magar makan to hai
zamin hai zer-e-qadam sar pe asman to hai
hazar jalvon ka to raz-dan hai a.ina
hui na aankh mayassar tujhe zaban to hai
badalta rahta hai rang asman lamhon men
sitam-shi.ar abhi mujh se ḳhush-guman to hai
gham-e-hayat se ghabra ke tajarbe ke liye
chale hi ja.enge ab dusra jahan to hai
tamam sahra-o-dasht-o-jabal kahen labbaik
azal se phaili fazaon men ik azaan to hai
zahe-nasib jagah thoḌi chashm-e-tar men mili
sulagti dhuup men ik sard sa.eban to hai
mohr-ba-lab huun pa shart-e-kalam qaa.em hai
miri shakeb-e-ayazi ka imtihan to hai
sa.uud fikr-e-taghazzul ko bojh hai to rahe
har ek harf haqiqat ka tarjuman to hai
asar ke sher men husn-o-kashish ki hai taujih
na.i jihat na sahi zeb-e-dastan to hai
Leave a Reply