vo lapeT kar nikli tauliye men baal apne
buund buund bikhre the har taraf ḳhayal apne
ko.ele ki Dheri par baiTh kar kaha us se
zindagi ke chulhe men jal rahe hain saal apne
dosto kisi ne kya kholne ki ḳhvahish men
jaan ke attachi men bhar diye jamal apne
puchhti ho hijran ki kaifiyat kidhar gham hai
martaban men shayad band hain malal apne
koi aag ka bosa hai kahin pe ḳhvabon men
ham ne apne mathe par likh diye saval apne
chahte the suraj ki dhuup dekhna lekin
us ne oḌh rakkhi thi charon or shaal apne
qatl to Darame ka act tha koi ‘mansur’
kis liye lahu se hain donon haath laal apne
Leave a Reply