jo barishon men jale tund andhiyon men jale
charagh vo jo bagulon ki chimniyon men jale
vo log the jo fareb-e-nazar ke matvale
tamam umr sarabon ke paniyon men jale
kuchh is tarah se lagi aag badbanon ko
ki Dubne ko bhi tarse jo kashtiyon men jale
yahi hai faisla tera ki jo tujhe chahe
vo dard-o-karb-o-alam ki kaThaliyon men jale
dam-e-firaq ye maana vo muskuraya tha
magar vo diip ki chupke se ankhḌiyon men jale
vo jhiil jhiil men jhurmuT na the sitaron ke
charagh the ki jo chandi ki thaliyon men jale
dhuan dhuan hai daraḳhton ki dastan ‘anvar’
ki jangalon men pale aur bastiyon men jale
Leave a Reply