Nigah-E-Tishna Se Hairat Ka Bab Dekhte Hain

nigāh-e-tishna se hairat kā baab dekhte haiñ

bisāt-e-āb pe raqs-e-sarāb dekhte haiñ

ukhaḌte ḳhemoñ pe kyā qahr-e-shām TuuTā hai

lahū meñ Duubā huā āftāb dekhte haiñ

nahīñ hai qatre kī auqāt bhī jinheñ hāsil

vo kam-nazar bhī samundar ke ḳhvāb dekhte haiñ

unheñ to vaqt kī gardish asiir kar bhī chukī

vo ab guzishta zamāne kā ḳhvāb dekhte haiñ

hameñ to mauj-e-ravāñ bhī nazar nahīñ aatī

vo log aur haiñ jo zer-e-āb dekhte haiñ

dayār-e-shauq kī miTTī meñ kyā guhar hī nahīñ

numū kī rut ko bhī be-āb-o-tāb dekhte haiñ

sazā milegī hameñ to ziyā-ba-doshī kī

charāġh-e-jāñ pe havā kā itaab dekhte haiñ

milā nahīñ unheñ sairābī-e-vujūd kā lams

ye dasht sadiyoñ se rāh-e-sahāb dekhte haiñ

Leave a Comment