nigah-e-tishna se hairat ka baab dekhte hain
bisat-e-ab pe raqs-e-sarab dekhte hain
ukhaḌte ḳhemon pe kya qahr-e-sham TuuTa hai
lahu men Duuba hua aftab dekhte hain
nahin hai qatre ki auqat bhi jinhen hasil
vo kam-nazar bhi samundar ke ḳhvab dekhte hain
unhen to vaqt ki gardish asiir kar bhi chuki
vo ab guzishta zamane ka ḳhvab dekhte hain
hamen to mauj-e-ravan bhi nazar nahin aati
vo log aur hain jo zer-e-ab dekhte hain
dayar-e-shauq ki miTTi men kya guhar hi nahin
numu ki rut ko bhi be-ab-o-tab dekhte hain
saza milegi hamen to ziya-ba-doshi ki
charagh-e-jan pe hava ka itaab dekhte hain
mila nahin unhen sairabi-e-vujud ka lams
ye dasht sadiyon se rah-e-sahab dekhte hain
Leave a Reply