ahmad-zafar

Siyah Raat Ki Har Dilkashi Ko Bhul Gae

siyah raat ki har dilkashi ko bhuul gae

diye jala ke hamin raushni ko bhuul gae

kisi kali ke tabassum ne bekali di hai

kali hansi to ham apni hansi ko bhuul gae

jahan men aur rah-o-rasm-e-ashiqi kya hai

fareb-khurda tiri be-rukhi ko bhuul gae

yahi hai sheva-e-ahl-e-vafa zamane men

kisi ko dil se lagaya kisi ko bhuul gae

zara si baat pe daman chhuda liya ham se

tamam umr ki vabastagi ko bhuul gae

khuda-parast khuda se to lau lagate rahe

khuda ki shaan magar aadmi ko bhuul gae

vo jis ke gham ne gham-e-zindagi diya hai ‘zafar’

usi ke gham men gham-e-zindagi ko bhuul gae

More Poems

Leave a Comment