kahta hai har makin se makan bolte raho
is chup men bhi hai ji ka ziyan bolte raho
har yaad har ḳhayal hai lafzon ka silsila
ye mahfil-e-nava hai yahan bolte raho
mauj-e-sada-e-dil pe ravan hai hisar-e-zist
jis vaqt tak hai munh men zaban bolte raho
apna lahu hi rang hai apni tapish hi bu
ho fasl-e-gul ki daur-e-ḳhizan bolte raho
qadmon pe baar hote hain sunsan raste
lamba safar hai ham-safaran bolte raho
hai zindagi bhi TuuTa hua aa.ina to kya
tum bhi ba-tarz-e-shisha-garan bolte raho
‘baqi’ jo chup rahoge to uTThengi ungliyan
hai bolna bhi rasm-e-jahan bolte raho
Leave a Reply