bahut zamin bahut asman milenge tumhen
pa ham se ḳhaak ke putle kahan milenge tumhen
ḳharid lo abhi bazar men na.e hain ham
ki ba.ad men to bahut hi garan milenge tumhen
ab ibtida-e-safar hai to jo hai kah sun lo
ham us ke ba.ad na jaane kahan milenge tumhen
jo raste men mile koi masjid-e-viran
to ham vahin kahin vaqt-e-azan milenge tumhen
ham intiha men milenge gar ibtida men nahin
nahin vahan bhi to phir darmiyan milenge tumhen
Thahar hi ja.enge aḳhir kahin janab-‘ehsas’
par apne sher men yuun hi ravan milenge tumhen
Leave a Reply