Jo Ashk Ban Ke Hamari Palak Pe Baitha Tha

jo ashk ban ke hamari palak pe baitha tha

tumhen bhi yaad hai ab tak vo khvab kis ka tha

hamesha puchhti rahti hai raston ki hava

yunhi ruke ho yahan ya kisi ne roka tha

laga hua hai abhi tak ye jaan ko khatka

ki us ne jaate hue kyuun palat ke dekha tha

khabar kise hai kise puchhiye batae kaun

purane qasr men kya subh-o-sham jalta tha

vajud hai ye kahin bah na jaae lahron men

gira gira ke palak aabju ko roka tha

fazaen aisi to ‘adil’ kabhi na mahki thiin

hava ke haath pe ye kis ka naam likkha tha

Leave a Comment