Shikast-E-Abla-E-Dil Mein Naghmagi Hai Bahut

shikast-e-ābla-e-dil meñ naġhmagī hai bahut

sunegā kaun ki duniyā badal ga.ī hai bahut

har ek naqsh meñ hai nā-tamāmiyoñ kī jhalak

tire jahāñ meñ kisī chiiz kī kamī hai bahut

gale lagā ke gul-o-nastaran ko royā huuñ

ki mujh ko nazm-e-gulistāñ se āgahī hai bahut

yahāñ kisī kā bhī chehra dikhā.ī de na sake

harīm-e-dil meñ tamannā kī raushnī hai bahut

maiñ ek lamha bhī mānind-e-sham.a jal na sakūñ

vo ek shab ke liye hī sahī jalī hai bahut

hai ḳhud-fareb bahut mere ahd kā fankār

hunar nahīñ bhī to shor-e-hunar-varī hai bahut

laboñ pe jaañ ho to ehsās-e-talḳh-o-shīrīñ kyā

kahīñ se zahr hī laao ki tishnagī hai bahut

ḳhirad ko naaz hai kyuuñ rasm-e-kaj-kulāhī par

sar-e-junūñ ke liye musht-e-ḳhāk bhī hai bahut

garāñ hai jins-e-vafā aur mushtarī nāyāb

hazār baar luTā huuñ ki dil ġhanī hai bahut

ajab nashāt ke pahlū ġham-e-habīb meñ haiñ

ki Dūbtī nahīñ ye naav Doltī hai bahut

tumhārā naam kisī ajnabī ke lab par thā

zarā sī baat thī dil ko magar lagī hai bahut

dam-e-vidā.a meñ yuuñ muskurā rahā huuñ ‘nasīm’

ki jaise un se judā.ī kī bhī ḳhushī hai bahut

Leave a Comment