Sadique Naseem
shikast-e-abla-e-dil men naghmagi hai bahut
sunega kaun ki duniya badal ga.i hai bahut
har ek naqsh men hai na-tamamiyon ki jhalak
tire jahan men kisi chiiz ki kami hai bahut
gale laga ke gul-o-nastaran ko roya huun
ki mujh ko nazm-e-gulistan se agahi hai bahut
yahan kisi ka bhi chehra dikha.i de na sake
harim-e-dil men tamanna ki raushni hai bahut
main ek lamha bhi manind-e-sham.a jal na sakun
vo ek shab ke liye hi sahi jali hai bahut
hai ḳhud-fareb bahut mere ahd ka fankar
hunar nahin bhi to shor-e-hunar-vari hai bahut
labon pe jaan ho to ehsas-e-talḳh-o-shirin kya
kahin se zahr hi laao ki tishnagi hai bahut
ḳhirad ko naaz hai kyuun rasm-e-kaj-kulahi par
sar-e-junun ke liye musht-e-ḳhak bhi hai bahut
garan hai jins-e-vafa aur mushtari nayab
hazar baar luTa huun ki dil ghani hai bahut
ajab nashat ke pahlu gham-e-habib men hain
ki Dubti nahin ye naav Dolti hai bahut
tumhara naam kisi ajnabi ke lab par tha
zara si baat thi dil ko magar lagi hai bahut
dam-e-vida.a men yuun muskura raha huun ‘nasim’
ki jaise un se juda.i ki bhi ḳhushi hai bahut
Leave a Reply