Poet
husn-e-sarshar tira daru-e-be-hoshi hai
hosh men kaun hai kis ko sar-e-mai-noshi hai
kuchh agar be-adabi hove to maazur rakho
sohbat-e-mai-kashi-o-alam-e-be-hoshi hai
jon hilal aap se yaksar main hua huun khali
tujh se ai mehr-laqa shauq-e-ham-aghoshi hai
bang-e-gul bais-e-gardan-shikni hai gul ki
ghuncha salim hai ki jab tak use khamoshi hai
sar chadha jaae hai ai zulf kasu ki to magar
us pari-ru se tujhe aaj jo sargoshi hai
aap ho jaae hai us tegh nigah ke aage
garche aine ke jauhar se zara poshi hai
umr ghaflat hi men ‘bedar’ chali jaani hai
yaad hai jis ki gharaz us se faramoshi hai
Leave a Reply