Sab Gharon Mein to Charaghon Ka Ujala Hoga

sab gharoñ meñ to charāġhoñ kā ujālā hogā

lekin afsurda faqat raat kā chehrā hogā

saarī parchhā.iyāñ goshoñ meñ dubak jā.eñgī

sūraj ubhregā to ye gaañv akelā hogā

ham to vābasta rahe ġham se vafā ke maare

ġham ne kyā jāniye kyūñkar hameñ chāhā hogā

jab khilī hoñgī tamannā ke shajar par kaliyāñ

dasht-e-ummīd meñ tūfān sā uTThā hogā

koī saaya sā hai chup chaap darīche meñ khaḌā

apnī ulfat kā hī shāyad vo hayūlā hogā

Leave a Comment