Hairat Sarae Harf Mein Aao to Baat Hai

hairat sarā.e harf meñ aao to baat hai

aur vāpsī kī raah na paao to baat hai

ḳhushbū ke bhed khulte nahīñ chaar roz meñ

phūloñ ke saath umr bitāo to baat hai

aise khulo khile hai ġhazal jaise ‘mīr’ kī

aa kar bhī ya.anī haath na aao to baat hai

le kar tumhāre giit jo utre diloñ ke paar

kāġhaz pe aisī naav banāo to baat hai

kyā lutf ā.īne se milī raushnī meñ hai

‘nainā’ diye kī qaid meñ aao to baat hai

Leave a Comment