Poet
divana mujh sa kab jiita hai kyuun tadbir karte hain
koi din chalne-phirne den abas zanjir karte hain
hava-e-garm ke lagne se kab patthar pighalta hai
ye naale in buton ke dil men kab tasir karte hain
khuda ki bandagi kahiye use ya ishq-e-mashuqi
ye nisbat ek hai sau sau tarah taabir karte hain
divane hain siyane chhod do tum naqsh ko un ke
parae ghar ki pariyon ke taiin taskhir karte hain
nigah karne men un ke kaam hota hai tamam us ka
‘yaqin’ ke haq men ye khuban bahut taqsir karte hain
Leave a Reply