us zulf ke saude ka khalal jaae to achchha
us pech se dil apna nikal jaae to achchha
shatranj men ji un ka bahal jaae to achchha
ai ‘mehr’ ye chaal achchhi hai chal jaae to achchha
is ziist se ab maut badal jaae to achchha
bechain hai dil jaan nikal jaae to achchha
mahrum huun is daur men saaqi faqat ik main
ai kaash khum-e-bada ubal jaae to achchha
kham thonk ke karta hai ye ab beach bula ke
is tarah ke tarrar ka bal jaae to achchha
is ishq men phir jaan ke pad jaenge laale
ab bhi dil-e-betab sambhal jaae to achchha
chhu jaae jo bande ki siva jism se tere
allah kare haath vo gul jaae to achchha
kya ishq sa hai ishq mohabbat si mohabbat
badlunga main is dil ko badal jaae to achchha
mumkin hi nahin hai ki bache jaan salamat
us kuche men mushtaq-e-ajal jaae to achchha
boson men maza qand-e-mukarrar ka ho saaqi
ik daur dobara ka bhi dhal jaae to achchha
ab zauq ki manind gham-e-ishq jigar men
kanta sa khatakta hai nikal jaae to achchha
rangini-e-fikr aur meri raushni-e-tamaa
kuchh laal-o-gohar aur ugal jaae to achchha
ahbab-e-banaras ke liye ‘mehr’ ka tohfa
ek aur bhi saath us ke ghazal jaae to achchha
Leave a Reply