jo husn-o-ishq se amn-o-aman men rahte hain
kahan ke log hain vo kis jahan men rahte hain
kalam-e-pak men hai zikr-e-hazrat-e-yusuf
ye husn-o-ishq har ik dastan men rahte hain
ilahi ab se hasinon ko mehrban bana
ki tere bande unhin ki amaan men rahte hain
tumhin to ho vo jo dard-o-alam men rakhte ho
hamin to hain vo jo ah-o-fughan men rahte hain
mujhe to aap se matlab hai chand suraj kaun
vo un ko chahenge jo asman men rahte hain
kidhar kidhar ke chale aate hain ye be-vahdat
kahan kahan ke tumhare makan men rahte hain
umiid ranj alam zabt dard sabr qalaq
ye sab hamare dil-e-na-tavan men rahte hain
hazaron kaam hain aise bhi dekh ai ghafil
ki ba.ad marg bhi log is jahan men rahte hain
ḳhuda samajh le lagane bujhane valon ko
ye ḳhvah-maḳhvah yahan men vahan men rahte hain
ishare aap ki abru ke koi kya jaane
ki kitne zahr ke tiir is kaman men rahte hain
hamari ḳhaas taraqqi hai ḳhana-virani
kabhi makan men the ab la-makan men rahte hain
agar samajh hai to dil de ke lutf-e-zist uTha
hazar fa.ede us ik ziyan men rahte hain
ḳhayal-e-dost men rahte hain ai safi’ jab tak
to is jahan men na ham us jahan men rahte hain
Leave a Reply